ہومی فائی پر ہم آپ کو گھر کی تعمیر و سجاوٹ سے لے کر زندگی گزارنے کے رہنما اصولوں تک سب بتاتے ہیں۔ ہماری خواہش ہوتی ہے کہ آپ ایک بہترین زندگی گزاریں جو آسان بھی ہو اور خوشگوار بھی۔ مگر اس مقصد میں جو چیزیں آپ کے آڑے آتی ہیں وہ وہی ہوتی ہیں جنہیں آپ چھوٹا سمجھ کر نظر انداز کیے بیٹھے ہوں۔ اور یہی آپ کی سب سے بڑی غلطی ہے جسے درست کرنے کا بیڑا ہم آج اٹھائے ہوئے ہیں۔
چاہے وہ ٹی وی کا کھویا ہوا ریموٹ ہو یا صبح کے وقت کپڑے چننے کا فیصلہ، ہماری زندگی کو بہت سی چھوٹی چھوٹی چیزیں ایک ساتھ مل کر مشکل بنا دیتی ہیں۔ ایسے میں کوئی بھی آسانی سامنے آئے تو اسے ہاتھوں ہاتھ لے لینا چاہیے کہ آخر اس ہل چل بھرے دور میں ایک آسان زندگی سےبہتر تحفہ اور کیا ہو سکتا ہے؟ اور یہی تحفہ آپ کی خدمت میں پیش کرنے کے لیے آج ہومی فائی لایا ہے ۱۰ ایسی تراکیب جو آپ کے روز مرہ کے کام آسان کر دیں۔ امید کرتے ہیں کہ ہماری یہ کاوش آپ کے لیے مددگار ثابت ہو۔
کیا آپ کے کمرے میں عجیب سی بو پھیلی ہے؟ اسے ختم کرنے کے لیے اے سی پر ٹیپ کی مدد سے ڈرائیر شیٹ چپکائیں اور اسے آن کر دیں۔ کچھ ہی دیر میں آپ کا کمرہ خوشگوار ہو جائے گا۔
اگر آپ موبائل پر لمبی ویڈیوز دیکھنا پسند کرتے ہیں تو آپ اسے ایسی جگہ پر رکھنا چاہیں گے جہاں سے یہ پھسلے نہیں۔ تو اس کا آسان ترین اور مفت حل یہ ہے کہ اپنی عینک فولڈ کر کے موبائل اس پر رکھیں۔
لوگوں سے بزنس کارڈ لینے کے بعد اپنے موبائل میں اس کارڈ کی ایک تصویر بنا لیں تا کہ اگر کارڈ گم بھی جائے تو آپ کو پریشانی کا سامنا نہ کرنا پڑے۔
بٹنوں والی شرٹ پر استری کرنے کے دوران اکثر بٹن آڑے آ جاتے ہیں، جس کی وجہ سے یا تو صحیح استری نہیں ہو پاتی یا بٹن ٹوٹ جاتے ہیں۔ سو آسانی سےاستری کرنے کے لیے ایسی شرٹ کو الٹا کر کے پریس کریں۔
ڈسٹ بن کے اندر کوڑا ڈالنے سے پہلے اس میں ایک پرانا اخبار رکھ دیں تا کہ نمی وغیرہ اس میں جذب ہو جائے اور بو نہ پھیلے۔
ایک کارڈ پر اپنی میڈیکل کی معلومات جیسا کہ خون کی ٹائپ وغیرہ اور ایمرجنسی نمبر لکھ کر اسے اپنے بیگ یا والٹ کی سامنے والی جیب میں رکھیں۔ یہ کسی نا گہانی صورتحال میں آپ کی جان بچائے گا۔
سفر کے دوران گندے کپڑے دھونا زیادہ تر ممکن نہیں ہوتا۔ تو انہیں ایک ٹوکری میں رکھ کر اس میں خوشبو والا صابن رکھیں تا کہ ان میں بو نہ آ جائے۔
کیا آپ بھی اپنی چابیاں اکثر مکس کر دیتے ہیں؟ مختلف چابیوں کی پہچان کرنے کے لیے ان پر مختلف رنگوں کی نیل پالشوں سے نشان لگا دیں۔
آئس کافی میں اصلی برف ڈالنے کے بجائے کافی سے ہی بنے آئس کیوبز ڈالیں تا کہ اس میں پانی نہ مل سکے۔
الماری میں کپڑے اوپر نیچے رکھنے کے بحائے انہیں تہہ کر کے ساتھ ساتھ کھڑا کر کے ترتیب سے رکھیں۔ اس طرح آپ ایک نظر میں سارے کپڑے دیکھ سکیں گے۔
مزید تجاویز کے لیے دیکھیے: گھر کی سجاوٹ کے لیے 7 آسان تجاویز۔